更多日本動畫,全新上架!
繼上篇推介咗日美兩國嘅動畫,今次就專門啲推介吓日本動畫,就如同上篇所述,日本動畫多數睇就都係有種患得患失嘅感覺,但係你以為日本動畫”得個SAD字”咁你就錯了,無錯驟眼眼落去唔係好結局,主人公多數都唔係BBQ收尾,但係正所謂”喊過先知感動,痛過先識珍惜”,呢一類”壞結局”令人留下更深刻印象,俾你有個機會去預先知道到底咁樣做會唔會留低一個遺憾。當你跟著故事主角係劇情路上一直前進,同佢一齊做每一個決定,去到最後得出一個無法改變嘅結果,反而可能令你係真實人生到做出”好決定”從而得出”好結局”,比起其他無病呻吟,夾硬搞嚟要你”感動落淚”嘅劇情結局,呢一類結局更顯突出,至於兩者如何區分每個人心裡都有把尺,今次就整幾套比大家自行判斷下。同樣無結局暴雷只有導讀,可以放心睇。
第一套要講嘅就係《聲之形》,平時睇開嘅都係曲折離奇,又要行萬里路,又要上太空,最後都係只差一點點先可以再會面,好似《聲之形》咁pure咁true嘅真係買少見少,最勁嘅係佢將兩個劇情論點融入一條線到:感情線可以話係純情嘅puppy love,對比起另一條線可以話係劇情嘅亮光;而另一條救贖線就係令我感動嘅地方,劇情開始就講述男主角'將也'細個成日霸凌女主角'硝子',正所謂”欺人者,人將欺之”,將也自食其果;長大後因心存愧疚而想向硝子道歉,故事就以此為設定展開,我仲記得我一路睇個感覺係好激氣好嬲,點解入面啲角色會做出咁樣嘅決定,點解唔反抗,我會有咁嘅感覺並唔係因為角色行為白痴,相反係因為劇情發展非常有代入感,而係劇中所見全部都係真實世界發生緊,令人感到無力,只可以眼白白睇住佢地發展,去到結局前面鋪排嘅劇情一次爆發,搞到我都流兩滴馬尿出嚟,呢一套絕對值得一睇再睇,細細回味!
“秒速五公分,是櫻花飄落的速度。”一句話成個畫面係我個腦入面係:櫻花落下,係櫻花樹底下兩人對話,淡淡哀傷,略有離別之意。咁有文青氣息嘅台詞就係嚟自好多人都睇過嘅《秒速5厘米》。故事方面分為3篇,每一篇都代表著主角嘅成長歷程,而我覺得咁樣分篇講故事亦都配合翻《秒速5厘米》嗰種不在乎結局,只在乎過程嘅感覺。劇情一樣係無任何魔法高科技嘢,但係嗰種淡然平靜同劇情形成反差,一路跟著故事前進你會感受到無可奈何,兩位主角俾時間巨輪推著行,一切都好似係自己決定但每個決定都帶著身不由已嘅感覺。每篇嘅結局都不是重點,應該可以話個過程就係結局,睇完之後會令你慢慢回憶以前所做過嘅選擇。
跟著落嚟就要放鬆翻個心情,整套輕鬆啲嘅《穿越時空的少女》。穿越時空題材可以話做到就嚟爛,大到太空星艦穿越宇宙小到個人穿越地球時間,但係大多數主角都係要拯救地球拯救人類,救咗咁多次係人都悶啦,而穿越時空的少女就無咁大個道德包袱壓著,令到劇情可以描寫翻更多角色係得到能力之後嘅發展,至於時空穿越所帶嚟嘅蝴蝶效應向來都係呢類電影動話嘅賣點或者難題,但係呢套動畫唔似得其他電影咁搞啲mind-blowing情節出來,相比之下《穿越時空的少女》更多嘅係一種選擇,而面對選擇嘅難題主角會點揀?咁就唔好錯過快啲去睇啦!
最後一套都係新海誠作品《你的名字》,之所以紅我覺得係因為題材夠新,無乜人用過,而且劇情相較輕鬆入口,作者巧妙咁利用兩個人會互換身份呢個設定嚟等主角慢慢互相了解,劇情亦都交代得夠清楚,令觀眾可以代入到嗰種由互不相識跟著誤打誤撞而墮入愛河,而重點就係呢個過程唔再由單一方去追逐或者相雙方因為驚失敗而變得被動嘅劇情,而係兩個主角都有明確目標咁追求自己想要啲對方,無咗嗰種劇情拉鋸嘅搔癢感,令觀眾更加容易接受,睇落去整體劇情亦更流暢更爽,更加貼合現代社會。配合埋新海誠一如既往”每frame攞出嚟都可以做桌布”嘅畫質,即刻升多幾個level,成為近呢幾年必睇嘅佳作。
聲之形 (友情紀念版) DVD TW 版 -MOP$ 166 無粵語
聲之形 (藍光平裝版) BD TW 版 -MOP$ 193 無粵語
聲之形 BD HK版 -MOP$ 205
聲之形 DVD HK版 -MOP$ 112
秒速5厘米 BD HK版 -MOP$ 174
秒速5厘米 DVD HK版 -MOP$ 112
穿越時空的少女 BD HK版 -MOP$ 205
穿越時空的少女 DVD HK版 -MOP$ 112
你的名字雙碟平裝版 BD TW版 -MOP$ 265 無粵語
你的名字 DVD
TW版 -MOP$ 152 無粵語
你的名字雙碟精裝版 BD TW版 -MOP$ 374 無粵語
你的名字 BD HK版 -MOP$ 174
你的名字+原聲大碟 (雙碟特別版) BD HK版 -MOP$ 215
你的名字(精裝珍藏版) BD HK版 -MOP$ 296
你的名字雙碟版 4K+BD HK版 -MOP$ 248
你的名字。 DVD HK版 -MOP$ 112
留言
張貼留言