正版4K UHD/藍光碟入門心得 #1
#1 藍光碟
好啦，上一編 #0 序 講咗成編廢話，今次就直入主題，揾咗一啲比較常見嘅問題統整一編心得文，希望對想初試嘅人有幫助。
TL;DR:
Q1: 到底乜嘢係Blu-ray(藍光碟)？
Ans: 一種光碟儲格式，主要分普通Blu-ray(藍光碟)(BD25/50GB)同埋4K UHD(4K碟)(BDXL 100/125GB)
Q2: 點分Blu-ray同4K UHD？
Ans: 一般情況可以由盒顏色嚟分，藍色Blu-ray，黑色4K，而盒身前後都分別會有Blu-ray Disc 或4K Ultra HD嘅字樣。
Q3: 乜嘢係4K修復版？
Ans: 一般會係較舊(90年代或之前)嘅電影出現，主要修復畫質及提升解像度，但並非4K碟。
Q4: 點先睇到Blu-ray？
Ans: 幾種選擇：家用遊戲主機、電腦+讀碟機+播放軟件 或藍光播放機。
Q5: 有咩播放軟件好用？
Ans: 主流選擇:PowerDVD、DVDFab Player(收費)或Leawo Player(免費)
Q6: Blu-ray碟分區？
Ans: 共分ABC三區，而港澳台版大部份都係全區碟或A區碟
詳細版：
Q1. 到底乜嘢係Blu-ray(藍光碟)？
Ans: Blu-ray(藍光碟)其實係一種儲存格式，同DVD/CD/VCD類似，都係一直演化升級變成而家嘅Blu-ray，而平時我哋見到嘅4K UHD 碟都係Blu-ray制式光碟嚟，因為容量唔同，普通嘅Blu-ray 碟有25-50GB容量，可以裝到一套正常FHD解像度電影，而4K UHD Blu-ray則升級到有100-125GB容量，可以裝到4K HDR電影。為咗方便區分，之後就有Blu-ray(藍光碟)同4K UHD(4K碟)
Q2. 咁到底點樣分辦啊？
Ans: 現時市面上所販售嘅Blu-ray一般都係用藍色半透明膠盒裝住，係個盒上方會寫住Blu-ray Disc嘅字樣，而4K UHD嘅碟則會係用黑色不透明膠盒裝住，係個盒上方會有4K Ultra HD嘅字樣；而盒後面亦會有分別係FHD 1080P或4K Ultra HD嘅字樣，當然，以上只適用於一般情況，有如一啲特別版或鐵盒版，就會有唔同包裝。
Q3. 成日見到有啲4K修復版，係咪真係4K碟？
Ans: 其實平時講開4K碟，除咗顧名思義係達到4K解像度之外，仲有一啲重要嘅指標例如係HDR10/Dobly Vision、影片編碼、位元速率、音軌音效等等，而大部份4K修復(尤其是舊港片修復)都係將原來片源提升4K解像度，可能再執執畫面顏色同一啲底片損傷再推出市場，但其實一般嘅Blu-ray碟都裝到。當然都有例外，好以基斯杜化‧路蘭就以4K規格修復經典《2001：太空漫遊》。
Q4. 又講咁多廢話，咁到底點先可以睇到Blu-ray碟啊？
Ans: 首先讀碟機，如果你屋企有PS3/PS4/Xbox One X/Xbox One S，你就已經達成條件，其中如果你擁有嘅係Xbox One X/S，你就可以睇埋4K碟；
如果屋企無遊戲主機但係有電腦的話，首先就要睇下你嘅目標係乜嘢，如果你家中有4K電視，我係強烈建議你買4K UHD讀碟機，如無係普通FHD電視，咁就普通藍光讀碟機都夠做；之後，你仲需要有效嘅播放軟件。
Q5. 硬件我有啦，咁軟件點搞？
Ans: 我諗呢一點先係大部份人卡住嘅地方，由於盜版猖獗，所有嘅正版碟都加咗一個叫做AACS嘅加密協定，令到碟嘅內容唔可以隨便開啓或者復製(當然現實情況係道高一尺魔高一丈，結果搞到我哋睇正版都要搞一大輪)，而想要取得呢個AACS解密鑰匙授權係要俾錢的，所以市面上絕大部份嘅播放軟件都要俾錢先用到(亦都有非老翻可以睇到嘅方法，呢點我下一編再詳細介紹)，而家比較主流嘅播放軟件有：PowerDVD、DVDFab Player(收費)同Leawo Player(免費)等等多種軟件。小知識：AACS鑰匙會不定期更新，所以有時播唔到碟嘅時候可以試吓更新軟件或者連上網睇下會唔會有新鑰匙更新。
Q6. 聽過話有Blu-ray有分區，會唔會買咗翻嚟播唔到？
Ans: Blu-ray有分ABC三區，港澳台日及美洲地區都屬A區，歐洲地區屬B區，而中國，俄羅期及其他中亞地區都屬C區，亦都有全區(ABC區)碟，基本上係港澳台版的Blu-ray都係A區或全區(ABC)碟，所以唔需要太擔心話買咗睇唔到，如果直係怕的話係碟盒後面都會有圖示註明隻碟係乜野區，大家都可以留意吓。另外4K UHD係無分區的。
如有任何需要或疑問，歡迎聯絡：
傑仔/Daniel 仔
Tel/whatsapp/wechat:+853 6806 7322
^港產片4K修復版藍光碟
^A區碟標示
留言
張貼留言