邁向天能，基斯杜化·路蘭(Christopher Nolan)電影之路！ #3

 

    有一段時間無更新，差啲就唔記得咗呢回事，前嗰排睇完天能之後先醒起，今日就會續著嚟講路蘭嘅蝙蝠俠三部曲，隔住兩套戲，但係為咗方便講解就一次過講哂三部曲先啦，一如既往，沒有結局爆雷，只有導讀，今次就因為三部曲串連埋一齊，所以中間會有小小相連嘅劇情，但唔影響觀看。

 -----------------------------------------------------------------------------------------

    成個三部曲以黃昏，黑夜同黎明分別對應《蝙蝠俠:俠影之謎Batman Begins》《蝙蝠俠:黑夜之神The Dark Knight》同《蝙蝠俠:夜神起義The Dark Knight Rises》，佢地係劇情上其實無好大嘅關連，你是但抽一集出嚟睇都唔會影響理解，但係如果你想了解佢嘅象徵義意咁就一定要按順序嚟睇先得，同復仇者系列唔同，蝙蝠俠並唔單止係一個超級英雄，佢係一個象徵，一個鼓舞人民面對罪惡面對黑暗時挺身而出，勇敢拒絕嘅象徵，但係“有多少光明就有多少黑暗”，蝙蝠俠嘅理念有幾正義，入面嘅反派就有幾邪惡。

 

而入面嘅反角都唔會純粹為破壞而破壞，佢地每一個背後嘅犯罪動機，其實都係我地間唔中都會有嘅諗法同思維，佢地無一個係天生壞人，全部都係因為思想腐化，扭曲從而變成壞人，佢地嘅理念同諗法有一定嘅道理，但係佢地所做嘅嘢全部都係傷害緊其他人，其實就係我地一般人平時遇到不公之事時腦海入面浮現出嚟嘅瘋狂諗法嘅縮影，將呢個縮影實體化成反角。

 

而厲害嘅係導演同編劇都將正反兩派嘅角色目標都包裝成同一個:“保護葛咸市人民”，所以驟眼睇落去你會有種“其實佢都無錯啊”嘅感覺，就連蝙蝠俠有時都有“做壞事”嚟達到目標，但係隨住劇情發展，雙方模糊嘅界線變得清晰，正反派所行嘅道路分歧亦都越嚟越大，呢個時候就更加容易分辨出兩者嘅最終目標係乜嘢，其實就好似當你遇到一件令你心情唔好嘅事情，你會有瘋狂想法同心中道德邏輯觀念交戰，最後得出一個結果從而令到你對呢件事作出反應，呢種“feelings vs logic”嘅交戰正正係電影想帶出嚟嘅訊號之一，電影並無明確咁講明話憑感覺做嘢一定係錯，或者一定要憑邏輯決定一切，而係話比你聽人本身就係會以兩者結合去處理事情，但係件事都應該有條底線，蝙蝠俠堅持唔殺人就係其中之一，電影裡面有幾次都差啲破戒，最後都係堅受底線，所以誰輕誰重一眼就睇得出，而要係心愛嘅女人同葛咸市嘅未來作出選擇，蝙蝠俠亦都有自己嘅決定，所以就都係嗰句要自己感受。

 -----------------------------------------------------------------------------------------

總結:路蘭嘅電影風格係蝙蝠俠三部曲發揮強大作用，佢嘅電影經常用理性包裝感性，就咁睇落去好似係要用邏輯去思考理解劇情咁，但係如果你用個“心”去睇自然就有另一番理解，而電影亦不乏“愛”呢個字，呢到並唔係單指愛情，而係一切人同人之間嘅聯繫同感受，三部曲由一開始就係因為要克服“恐懼”呢種感覺而開始，到最後化成一個象徵，鼓勵人民，而我地亦都跟住主角成長之路去了解佢內心個把道德尺嘅轉變，到底邊啲做得邊嘅唔可以做?咁就快啲自己睇完慢慢消化下啦!

 -----------------------------------------------------------------------------------------

可使用以下連結查詢價格或直接連繫我,每日更新不同影碟,快啲嚟睇吓有無啱心水啦!

價格表: https://tinyurl.com/y6f525zt

如上表無你想要嘅碟亦都可以直接俾我名我去揾!

如有任何需要或疑問，歡迎聯絡：

Tel/whatsapp:+853 6806 7322

Facebook: https://www.facebook.com/redeyesmediasolution

Blog: https://redeyesmedia.blogspot.com/