正版4K UHD/藍光碟入門心得 #0
序：
仲記得我買嘅第一隻DVD，係劉德華同張柏芝出演嘅《老鼠愛上貓》哥陣我無諗過話要支持正版之類嘅嘢，只不過係純粹上網揾唔到而焗住去買隻碟睇下，價格唔貴，睇完之後我個懷舊Mode即刻著咗，開始去揾更多嘅舊式港產片去睇，一路睇住只有一種奇怪嘅感覺：點解個劇情同個情緒好似同我以前睇嘅唔一樣嘅？然後我先發覺：配音！無錯，網上流通嘅片源都係啲普通話音軌DVDrip又或者係啲電視台轉錄嘅片段，而多數呢類片為咗避開版權偵測同埋方便係網上流通(以前上網頻寬無而家咁高)，所以都會對影片進行極度壓縮，為咗可以睇到正常畫質嘅電影，我開始越買越多，踏上咗成魔之路…
而我買嘅第一隻Blu-ray，係狄卡比奧嘅《復仇勇者》（The Revenant），嗰陣時我都係完全無接觸過Blu-ray，淨係聽講話甚麼FHD 1080P，乜嘢色彩有幾細緻色域有幾廣之類嘅嘢，同埋話哂係狄卡比奧人生第一次攞奧斯卡金像獎(老實講我覺得潛行凶間佢更應該攞到獎)，所以就買隻碟睇吓，我仲記得好興奮咁買咗隻碟翻到去，先發覺原來一般DVD讀碟機係播唔到Blu-ray，隔咗兩日終於買到部機先發覺原來仲要用埋某啲播放軟件先睇到，成個過程曲折到無朋友，到真係睇到嘅時候，我嘅反應只有兩個字可以形容：屌！值！係之前我對FHD電影嘅槪念只有解像度高過DVD呢會事，但係見識過Blu-ray之後先發覺原來之前所睇嘅所謂”高清電影”都只不過係經過壓縮之後用嚟宣傳”XX最大的娛樂場上線了”嘅產物，個畫無論係解像度、對比度、色彩抑或係場景入面唔同物件嘅距離表演都完全比唔上Blu-ray(當然啦，科技發達而家嘅壓縮技術都有所提升)，就係咁，我由買DVD變成Blu-ray…
仲記得我第一次睇基斯杜化‧路蘭嘅《星際啟示錄》(Interstellar)嘅時候，係我見到呢隻碟造緊特價所以買嚟睇睇，睇完我心諗：點我會錯過入戲院睇呢套戲！係IMAX嘅加持加埋導演堅持使用大量實境下，電影入面有大量場面比人一種極其宏偉嘅感覺，雖然係只係FHD，但係都可以感受略略感受到某幾嗰場境嗰種浩瀚無垠嘅氣勢，嗰一刻我只係心諗：如果電影院重播就一定要入場睇；直到有一日機緣巧合底下買到部4K電視，我即刻就借咗隻4K碟嚟試機，但係Blu-ray碟惡夢又出現，首先要揾讀碟機，跟住又話要CPU主機板顯卡要去到某一個階級，最後又嚟播放軟件支援問題，一翻曲折之後終於可以睇到4K HDR嘅威力，原本係FHD畫質略微模糊嘅星體背境，一啲有細小粒子嘅場境(雪、沙、水點等)係4K解像底下變得清晰可見，所有嘅模糊星體都變翻做銳利嘅光點，而係HDR加持下原來較暗太空場境都變翻較接近平時嘅顏色同光度，唔再係灰暗暗一片，就係咁，4K之路開始了…
如有任何需要或疑問，歡迎聯絡：
傑仔/Daniel 仔
Tel/whatsapp/wechat:+853 6806 7322
留言
張貼留言