動畫藍光高畫質上演!加埋粵配更上一層樓!
網絡上成日都見到SUB(字幕)>DUB(配音)之類嘅言論(亦都有話DUB>SUB嘅人)，尤其是係動畫方面特別多，因為真人電影口形方面配音比較難對，而動畫就比較少呢個問題。支持睇動畫配字幕嘅人就話緊係原汁原味啦，原版聲優有幾優秀，動畫其中一個賣點就係原版配音等等論點；而支援配音嘅人就話本地配音組會將一啲外國文化融入本地文化同用語，令到人更容易理解劇情同文化，以及笑點等就咁睇字幕未必可以睇得明嘅位，更有代入感，亦都令睇動畫時無需分神去睇字幕。
正所謂仁者見仁智者見智，到底邊樣好都係由大家自己判斷啦，不過有一點可以肯定嘅係配音質數絕對影響觀看者對影片嘅感覺，甚至係對劇情嘅理情，廣東話配音界都有有好優質人材同作品，可惜嘅係而家配音作品越嚟越少，仲記得以前睇明珠930嘅電影都會有配音，而家都已經消失了，而動漫配音都係買少見少，好似《鋼之鍊金術師FA》《銀魂》《男子高中生日常》呢嘅對配音劇本地化嘅高級作品就更加稀有，今日我就揀咗幾套係我個人排行入面頭幾位嘅動畫比大家有個參考！放心，以下評論不會談及主劇情和結局！
-----------------------------------------------------------------------------------------
《千與千尋》係我個人排名入面頭幾位，原因係我比佢嗰種奇幻嘅風格吸引住，相比起《千之谷》呢類比較偏科幻、以Steam Punk為背景有大量機械嘅動畫，《千與千尋》入面啲人物好似湯婆婆、白龍、無面男呢類奇幻魔法角色令我有更深刻嘅印象，而配音方面我覺得非常之好，除主要角色之外連其他次一級嘅配角配音嘅語氣同長度都跟得到個畫面，呢隻碟仲有得用原版分鏡草稿配動畫音軌嚟睇，等你可以用動畫師創作嗰時嘅角度同諗法去欣賞！
貓奴必睇！如果你隻貓識講野，而且佢仲有另一個身份：貓之王國嘅市民咁成件事會點？小心以下少少暴雷。《貓之報恩》講述好心嘅人類女仔救起咗一隻貓：一隻由貓之王國嚟嘅貓王子，之後被迫婚至貓之王國從而產生嘅反抗奇幻故事。老實講對比起《千與千尋》，我更加鐘意《貓之報恩》入面嘅角色，每個角色嘅性格同特徵都描繪得十分特出明顯，各有不同，而配音版有著奇特嘅吸引力，由其是係貓男爵嘅配音，另外呢套嘅配音唔會好似其他咁因為配音而搞到場境音效變得細聲，同埋我都好鐘意呢兩套動畫嘅故事設定，同樣係因為某啲事情而被迫進入異世界，睇落美好嘅異世界其實暗藏危機，最後就好似一場夢咁醒來，世界一切如常但自身嘅改變同經歷就只有自己知道。
相比起日本動畫嗰種主角會跟著故事進度而獲得心靈成長嘅偏成人劇情，美國動畫就更加適合一家大細去睇，輕鬆得嚟又不失感動。《怪獸公司》就係一套咁嘅動畫，劇情講述係另一個世界有一班怪獸，以細路仔嘅驚聲尖叫作為動力來源，而主角就係任職怪獸電力公司嘅一名“怪獸＂，專門係夜晚出嚟嚇啲細路以獲取佢哋嘅尖叫聲發電，但係當一名應該被嚇嘅細路意外進入怪獸世界，成件事就變得複雜起嚟。裡面角色嘅互動非常可愛搞笑，最啱就係大人小朋友一齊睇，你嘅小朋友成日都驚夜晚有怪獸捉佢？睇完之後話唔定佢想直接住係衣櫃添啊！配音版水準依然保持，話哂都係迪士尼出品，係有保證嘅。
有無諗過係其他平行宇宙嘅你到底過著乜嘢生活？再極端啲諗，如果係平行宇宙入面嘅“你＂除咗經歷類似之外其他嘢完全截然不同，你見到“自已＂嘅會有乜反應？《蜘蛛俠：跳入蜘蛛宇宙》一次過就有幾位不同嘅蜘蛛俠對抗敵人，除咗要應付敵人，仲要面對自己一直都逃避嘅經歷同弱點，直視自己嘅心魔，到底動畫版同電影版有乜唔同，我可以話改編得非常巧妙，畫風亦都十分新穎，可以用潮嚟形容，絕對值得收藏！
總結：動畫嚟講，我睇嘅數量唔算多，你可能睇完之後會問點解無《秒速五厘米》《你的名字》《超人特工隊》《史力加》等等架？今次由於篇幅關係，留待下再介紹！另外就係我覺得日本嘅動畫嘅劇情同題材其實係偏成人嘅，著重人與人之間嘅關係同心路歷程，而且唔係成日都有Good Ending！睇完之後多數都會有種悲得悲失，心情較為沉重，而美國動畫偏輕鬆，行小朋友路線，劇情都係邪不能勝正，引導你去正面思想，熱血同友情呢啲就唔少得啦，畫風都係可愛搞笑多，就都係交翻比大家自行判斷啦。最最後就係配音，其實係香港都有好多配音人材，但係而家動畫配音質數其實有下降，以前連配角嘅配音都十分認真，而且台詞都十分Local，而家就好似只要配啱個時間同話面就收工，希望係將來動畫配音可以重拾往日嘅光輝啦！
-----------------------------------------------------------------------------------------
留言
張貼留言