正版4K UHD/藍光碟入門心得 #2
#2軟件編
上編#1 就簡單介紹咗乜嘢係藍光碟同睇藍光有乜需求，今編就會講解藍光播放軟件，呢次我就揀咗三隻軟件，分別係：Leawo Player(免費)、DVDFab Player同PowerDVD Player(收費)；會揀Leawo係因為市面上可以免費播到藍光碟嘅係得佢一隻；而DVDFab 同PowerDVD係市面上唯一(二?)收費嘅播放器同時可以播到Blu-ray同4K UHD 碟嘅軟件，今次我就用咗4K UHD嘅《未來戰士：黑暗命運嚟》做測試，下面正式開始。
1. Leawo Player
網址：https://www.leawo.com/blu-ray-player/
售價：免費/USD$22.47(HKD$~180)一年/USD$49.97(HKD$~400)終生
Leawo Player 其實係有收費版的，既然佢做得個免費版出嚟當然亦都有限制啦，使用限制就係無得用選單模式去播放藍光碟，軟件會自動偵測隻碟入面正片(最大嗰個檔案)去播放，所以係影片播放時就要自已係功能表到揀翻想要嘅字幕同音軌，而係播放時會有收費版嘅廣告間歇性彈出嚟，唔會好多，可能睇完成套戲都係得2-3次。
功能介面方面亦都比較簡單，唔會好似PowerDVD或DVDFab有多咁色彩、光暗、對比度設定，你亦可以設定->介面語言 設定首選字幕/音軌語這，不過小弟設定完之後似乎無乜作用，所以我都係手動揀啦；而介面語言就有簡中同英文可選，有趣嘅係我發現當你揀介面語言嘅時候只可選擇用相關語言嘅時區，例如簡中嘅時候時區會得翻北京可選。
總結：可以播放4K UHD/Blu-ray，但係就無選單模式，只可播放正片，都無乜嘢可以抱怨，話哂佢係免費嘅有得俾你睇都偷笑啦！
2. PowerDVD Player
售價：PowerDVD 20 Ultra HKD799終生/ PowerDVD 365 HKD37每月
作為老牌”正規”光碟播放軟件，PowerDVD可以話係最多限制嘅收費4K UHD碟播放軟件，係硬件上除咗需要有第7代intel CPU(支援Intel SGX技術)，顯示卡要GTX10XX系列以上之外，你嘅主機板、讀碟機、HDMI線，就連輸出都一定要用內顯先可以成功播放，所以你都咪話唔頭痕，具體硬件SPEC可以用PowerDVD嘅官方檢測工具嚟睇睇自已是否符合要求。
軟件使用介面唔會太繁複，打開畫面有得揀電腦模或電視模式，電視模式底下個選單介面同一般播放機嘅畫面相似，方便你用鍵盤操作，小弟嘅感覺就係”除褲放屁”！既然都係要用滑鼠鍵盤在電腦上睇碟，我哋我係睇翻電腦模式啦，係電腦模式底下，如果你入咗碟佢就會自動跳去播放畫面，喺呢個畫面如果你有連上網的話佢會自動下載電影有關資訊如：中英文名，年份，導演及演員，仲有電影簡介同影評，呢一點我覺得都幾貼心同實用，而係下方就會有PowerDVD嘅TureTeater 增強功能，可調教色彩、光暗對比同音效，連畫面尺寸都有得調整，係睇舊DVD時非常有用。而佢嘅快進快退功能我就覺得麻麻地，係快進X8倍速時已經會跳格播放，唔方便有時想揾某一電影場景重温或者快進揾片尾彩蛋，而DVDFab Player嘅快速我去到X16倍速先會跳格。PowerDVD亦都支持3D或VR，有興趣嘅朋友可以試下。
總結：麻X煩，平時我係睇碟都係DVDFab，但因為有時某啲碟無法正常播放我先會用PowerDVD．而佢嘅每月訂閱方式亦都比較易吸引人入門。
3. DVDFab Player 6
網址：https://www.dvdfab.cn/media-player.htm
售價: DVDFab Player 6 Ultra 2年USD$99(HKD$~800)/終生USD$149(HKD~1200)
DVDFab呢間公司其實並唔係專賣播放軟件，佢主要做嘅係光碟DRM破解或者刻錄技術軟件，所以佢個播放器可以播到4K UHD亦都好正常，而作為一間破解DRM公司，佢就唔再需要你有啲乜嘢硬件播放要求，只要你有親4K嘅讀碟機就得，就算無4K UHD芒一樣可以播到！
乜話？無4K芒睇4K UHD碟做乜X？少年你太年輕了，係#1藍光碟呢編我介紹4K UHD碟除咗解像度去到4K，最重要嘅其實係HDR同Bitrate(位元速率)，HDR令到畫面色彩更鮮艷更廣，較貼近現實色彩，最重要係暗淡嘅場面唔再灰矇矇一片，而Bitrate高低決定畫質細緻，呢一點同係Youtube睇片有著同曲異工之妙，即使你無4K芒，只有係Youtube影片較高解像度亦同時會提升Bitrate，從而令到條片睇落去較為清晰。另外，DVDFab Player亦提供HDR模擬技術，效果出到嚟見仁見智，我就覺得還可以啦。
最後到使用介面，簡單無花巧嘢，正常選單模式播放光碟，亦可選擇簡單模式入碟直接播正片，較實用嘅就係喺正常選單模式底下亦可飛走碟片啲警告或者廣告，非常方便。DVDFab 支持3D，但係唔見有VR揀。
總結：DVDFab Player可以話最實用嘅播放軟件，而且無需硬件要求，非常親民，但缺點就係有陣時會播唔到，大約每1X隻碟入面會出現1-2隻，到最後都係要用翻PowerDVD播。
後記：上述三隻播放軟件，Leawo Player係我一開始接觸藍光碟嗰陣先用，之後一直都係DVDFab 同PowerDVD輪住用，如果係都要排名嘅話我會分開：
格價排行：
PowerDVD->Leawo->DVDFab
PowerDVD唔洗多講，訂閱制就比較好控制，平時用Leawo，真係播唔到先用PowerDVD．
個人實用排行：
DVDFab->Leawo->PowerDVD
DVDFab較為全面，功能亦都比Leawo多，而且佢可以幾部電腦一齊用(要額外加USD$30~HKD$240)但價格貴USD$149(HKD~1200)；Leawo中規中舉，終生授權都係USD$50(HKD$~400)；而PowerDVD限制多多，終生價格較貴(HKD$799)，勝在佢可以每月訂閱，較容易接受。
最後再提醒大家，千其唔好正價買，唔好正價買，唔好正價買！呢類軟件經常會搞優惠，而且每次都20%off起跳，個優惠頻率仲高過街邊結業大清貨嘅嘅舖頭！而且多數都會有Bundle，可以連埋其他想要嘅軟件一齊買，所以除非你急到就嚟賴，如果唔係都係忍一忍啦。仲有一點，所謂嘅終生版係指你買當下嘅版本終生使用，例如我買咗2019，咁當佢出咗2020嘅時候你就要再俾較少嘅錢”升級”，基本上佢地每年都會出個新版本，每代之間都係大同小異，例如升級版就支援8K播放。所以如果無需要嘅話其實唔升級一直用都無問題，最多就係無咗技術支援，問客服嘢佢會同你講話係舊版本問題，焗你比錢升級。
留言
張貼留言